* कब बनही मुक्ति धाम.? — तरीघाट के ग्रामीण मन के सवाल, अंतिम संस्कार बर नई मिलत सुविधा, एक साल बाद घलो अधूरा हे तरीघाट मुक्ति धाम के सपना…
*: सांसद के घोषणा बाद घलो नई बन पाए श्मशान शेड- ग्रामीण नाराज, बरसात ले पहिली मुक्ति धाम बनाय के मांग तेज…
पाटन (तरीघाट) : पाटन विकासखंड के ग्राम तरीघाट गांव म मुक्ति धाम के हालत ला लेके ग्रामीण मन म भारी नाराजगी देखे जा थें। गांव म आज तक व्यवस्थित श्मशान घाट नई बन पाए हे, जेन से अंतिम संस्कार करे म गांव वाले मन ला भारी दिक्कत झेलना पड़त हे। ग्रामीण मन के कहना हे कि श्मशान घाट जर्जर होके टूट चुके हे, अऊ आज तक नवा निर्माण नई हो पाए हे।
ग्रामीण मन बताथें कि मुक्ति धाम तक पहुंचाय बर न बने सीसी रोड हे अऊ न पानी के सुविधा। एखर संग शव यात्रा म आए लोगन मन बर बइठक अऊ विश्राम के घलो कोनो व्यवस्था नई हे। हालत अतेक खराब हे कि कई बेर गांव वाले मन ला अपन मृतक परिजन के अंतिम संस्कार बर दूसर गांव जावय ला मजबूर होना पड़त हे।
गांव वाले मन ओ बखत ल याद करथें जे दिन गांव के मिशा बंदी स्वर्गीय गोवर्धन जायसवाल के राजकीय सम्मान संग अंतिम संस्कार के दौरान दुर्ग के लोकप्रिय सांसद विजय बघेल, विधायक ललित चंद्राकर अऊ प्रशासनिक अधिकारी मौजूद रिहिन। ओ बखत सांसद विजय बघेल ह गांव म श्मशान शेड बनाय के बात कहे रहिन।
फेर एक साल बीत जाए के बाद घलो निर्माण कार्य शुरू नई हो पाए हे। ए मामला म वर्तमान सरपंच अऊ भाजपा नेत्री चंद्रिका साहू के कहना हे कि श्मशान घाट निर्माण बर पंचायत स्तर म लगातार प्रयास करे जात हे।
अब बरसात के मौसम नजदीक आ गे हे, अइसने म ग्रामीण मन के चिंता बढ़ गे हे कि अइसन ऊबड़-खाबड़ अऊ जर्जर जगह म अंतिम संस्कार करना अउ कठिन हो जाही। गांव वाले मन शासन-प्रशासन अउ अपन मयारू सांसद ले जल्द मुक्ति धाम निर्माण के मांग करे हावे।
