* तरीघाट उपस्वास्थ्य केंद्र म पानी के भारी संकट, बोर खनन अब तक नइ होइस, स्वास्थ्य केंद्र म बुनियादी सुविधा के अभाव, ग्रामीण मन म बढ़त नाराजगी- अशोक कुमार साहू…
* तरीघाट उपस्वास्थ्य केंद्र म पानी संकट गहराय, एक साल म घलो नइ होइस बोर खनन, जिम्मेदार मन ऊपर उठत सवाल…
पाटन(संतोष देवांगन): पाटन क्षेत्र के ग्राम पंचायत तरीघाट स्थित उपस्वास्थ्य केंद्र म पानी के गंभीर किल्लत बने हावे। मगर संबंधित विभाग द्वारा अभी तक एक ठन बोर खनन भी नही करे गेए हावे. अउ ए पानी समस्या के चलते मरीज मन अउ अस्पताल स्टाफ ला भारी दिक्कत के सामना करना पड़त हावे।
पूर्व सरपंच अउ जोहार छत्तीसगढ़ पार्टी के दुर्ग जिला महासचिव अशोक कुमार साहू द्वारा ए मुद्दा ला कई बार जिम्मेदार अधिकारी मन तक पानी के समस्या के समाधान करे सेती उपस्वास्थ्य केंद्र म बोर खनन के बात पहुंचाय गेय हावे। वोमन बताइन कि पत्र व्यवहार के माध्यम ले कई दफा जानकारी देय गेय, फेर अब तक कोनो ठोस कार्रवाई नइ होइस।
बताय जात हे कि अशोक कुमार साहू बीते एक साल ले एसडीएम पाटन अउ जिला कलेक्टर दुरूग कार्यालय के चक्कर काटत हें, फेर उपस्वास्थ्य केंद्र म बोर खनन के काम आज तक शुरू नइ हो पाय हे।
ए स्थिति म अब ए सवाल उठत हे कि आखिर जिम्मेदार अधिकारी मन अपन आँखी ल मुंद के कब तक अनदेखी करत रहिहें?, पानी जइसन बुनियादी सुविधा के अभाव म मरीज मन के इलाज प्रभावित होवत हावे, जेन ह स्वास्थ्य व्यवस्था ऊपर गंभीर सवाल खड़ा करत हे।
ग्रामीण मन अब जल्द ले जल्द बोर खनन कराके पानी के व्यवस्था करे के मांग करत हें, ताकि उपस्वास्थ्य केंद्र म इलाज कराय बर आथे मरीज अउ ओकर परिजन मन ला किसी प्रकार के परेशानी झेलना नई पड़े।
