* पाटन म गूंजही छत्तीसगढ़िया संस्कृति अउ स्वाभिमान के जयघोष, 6 सितंबर ल होही “जबर आठे तिहार”
* अजय यादव अउ अमित बघेल होहीं शामिल, पाटन मं होही “जबर आठे तिहार” के भव्य आयोजन
पाटन। छत्तीसगढ़ के लोकसंस्कृति, परंपरा अउ तीज-तिहार ल सहेजे बर “छत्तीसगढ़िया क्रान्ति सेना पाटन” के ओर ले 6 सितंबर 2026, रविवार के पाटन म भव्य “जबर आठे तिहार” के आयोजन करे जात हे। कार्यक्रम म छत्तीसगढ़िया क्रान्ति सेना के प्रदेश अध्यक्ष डॉ. अजय यादव अउ जोहार छत्तीसगढ़ पार्टी (JCP) के सुप्रीमो छत्तीसगढ़िया बघवा अमित बघेल विशेष रूप ले शामिल होहीं।
आयोजक मन के कहना हे कि “जबर आठे तिहार” सिरिफ एक सांस्कृतिक कार्यक्रम नइ, बल्कि छत्तीसगढ़ के लोकपरंपरा, संस्कृति अउ छत्तीसगढ़िया स्वाभिमान ल जिंदा रखे के एक प्रयास आय। तिहार के माध्यम ले छत्तीसगढ़ी लोककला, परंपरागत संस्कृति अउ हमर पुरखा मन के देय विरासत ल नवा पीढ़ी तक पहुंचाए के संदेश देय जाही।
सुबह निकलही भव्य रैली
कार्यक्रम के शुरुआत सुबह 10 बजे अखरा दाई मंदिर ले भव्य रैली के साथ होही। रैली पाटन नगर के प्रमुख सड़क, चौक-चौराहा ले गुजरत हुए नवा बस स्टैंड “दईहान” पहुंचही। रैली मं छत्तीसगढ़िया समाज के लोगन के संग युवा, माताएं-बहिनी अउ संस्कृति प्रेमी मन के बड़ी संख्या मं शामिल होय के उम्मीद हे।
शाम 4 बजे होही मंचीय कार्यक्रम
रैली के बाद शाम 4 बजे नवा बस स्टैंड “दईहान” मं भव्य मंचीय कार्यक्रम रखे गे हे। इहां छत्तीसगढ़ के पारंपरिक संस्कृति, लोकपरंपरा अउ तीज-तिहार के रंग देखे बर मिलही। कार्यक्रम के मुख्य संदेश “हमर तिहार—हमर संस्कृति—हमर पहचान” रखे गे हे। आयोजक मन के मुताबिक, अपन संस्कृति अउ परंपरा ल बचाए रखे के जिम्मेदारी समाज के हर सदस्य के हे।
पारंपरिक वेशभूषा म पहुंचई के अपील
छत्तीसगढ़िया क्रान्ति सेना पाटन के ओर ले समस्त छत्तीसगढ़िया समाज अउ क्षेत्रवासी मन ले अपील करे गे हे कि वो मन पारंपरिक वेशभूषा अउ छत्तीसगढ़ी सांस्कृतिक रंग के संग कार्यक्रम मं बढ़-चढ़ के हिस्सा लेवंव अउ “जबर आठे तिहार” ल यादगार बनावंव।
आयोजक मन कहिन कि “अपन संस्कृति, अपन परंपरा अउ अपन तिहार ल बचाना हमर सबो के जिम्मेदारी आय।” एही संकल्प के संग पाटन के धरती मं ये भव्य आयोजन करे जात हे।
